ام بطي : وحليله بطي مستانس وايد ..
شيما : عشان بيستوي ابو يعني ؟؟
ام بطي الا تقهرها : لا وين .. عشـــان بييه ولد من شما ...
شيما : اها ..
ام بطي : يلا الغالية اخليج الحينه .. مع السلامة ..
شيما : مع السلامة ..
.
.
* يمكن ما تكون هاي نهاية المشاكل ف حياة شما ...
بس كونوا على ثقة .. ان بسببها .. ما بترضخ شما لها *
.
.
اتصلت شما بعاشة ..
عائشة : الف الف مبروك الغالية تستاهلين والله ..
شما : الله يبارك فيييج والله .. عاد اسمحيلي رقدنا بسبة سالفة راشد ..
عائشة بضيج : شما ..
شما : هلا ..
عائشة : اسمحيلي بس انا بكمل دراستي ..
شما بأسف : قرارج النهائي ؟؟
عائشة : هي .. وباقتناع بعد ..
شما بحزن : كان ودي تكونين لاخويه .. بس دام هذا رايج .. خلج على يقين ان صداقتنا بتم شرات ما هي عليه ..
عائشة : اكيد ؟؟
شما : اكيد يا الغلا .. ولو يا عويييش ؟؟
عائشة : فديتج والله ..
----------------
~(( لا يمكنُ لشمس ِ الحقيقةِ أن تندثر .. فلكل ظالم يوم .. ولو كان هذا اليوم .. هو نفسه يوم المحشر ))~
وأخيراً .. تم القبض على أمل .. وخالد ..
.
.
يا ترى شو جزاءهم ؟؟
السجن بس ؟؟
الأشغال الشاقة ؟؟؟
.
.
تقرر أن يكون العقاب هو الإعدام شنقاً للإثنين ..
عقوبة
لجرائم الاختلاس والسرقة ..
والقتل المتعمد لمنصور ..
الله يرحمك يا منصور ..... ويجعل مثواك الجنة ..
تذكروا يا اخواني ..
أن الله يمهل ولا ... يهمل ...
---------------
وبعد مرور أكثر من 5 أعوام ..
ملاحظة : بعد سنة ونص عطتكم ام مها عمرها .. واستوى البيت لمها ..
تحديداً .. في مول الإمارات ..
وجريب من لعوب اليهال ...
مها : سيفوووو .. جسووووم .. تعالوا بسرعة ..
سيف ياي يصيح عند أمه : اميييييي لحقي عليه جسوم ضربنييييي ..
مها : لا حول ولا قوة الا بالله .. والله انكم هب ويه لعوب .. اييبكم هني عشان تتضاربون ؟؟ وينه المستخف جسوم .. شيطان هالولد من يومه ..
حست مها بنغزة ف قلبها وهي تجوف ولدها من بعيد ويا واحد عاطنهم ظهره ..
مها : سيف ازقر اخوك ..
سيف اونه مستريل : لابويه مافيه انتي روحي ..
مها تطالعه بحدة : نش احسن لك وسير ازقره ولا تخليني أحلف اني ما اييبكم هنيه مرة ثانية !! ..
سيف طالع أمه بإجرام ونش صوب جاسم ..
سيف سار حط ايده ع جتف الريال : ايه انته جسوم تعال ...
الريال التفت له وبكل حب : انته سيف صح ؟؟
سيف بنظرة استغراب : انا ماعرفك .. اميي قالت لي ما أخبر حد عن اسمي ..
الريال بشوق : وينها أمك ؟؟
سيف بغيرة مع انه ياهل : مالك خص شو تبا بها ؟؟
الريال : ههههههههههه ما بصرقها والله
جاسم : بابااا هذيييي ماماااااا ...
صد محمد على مهــــــــا ...
التقت العيون .. التقت نظرات متلهفة .. نظرة محمد لمها .. ونظرة مها لمحمد ..
محمد بكل حب وشوق : مــــــــهــــا ؟؟؟؟؟؟
مها بعد ما مرت عليها لحظات حياتها اللي تعذبت فيها .....
***
ليتك تحس بجروح الليـــــــالي و بسيـــــــل دمعها
ليتك تحس بظما الأيــــام وظما السنيـــــــن الطوال
وليتك تحس بأوجـــــاع القلــــــوب و بسر خوافيها
ليتك تحس .. بس انت عديم الاحســـــــاس بالحال
ما بقولك ارجع .. وترجع للقلـــــــوب يــــا قاسيها
كيف ترجع وانت اللي جعلت أيـــامي سواد وظلال
مهما دربـــــــك مشى بك لا تظن انـــــك بخطاويها
ترى خطاوي الحب مـــــاهي لعبة تميل لك وتنمال
الحب أصــــدق من حروفك وأصــــدق من معانيها
الحب أسمى من صـــــــدى كلامك وسنينك البخال
ماعاد يهمني وصـــــالك .. حياة الذل مــاعاد ابيها
حبك تبخر من قلبي وصار كان ياما كان يا أطفال
عديتك أعز أحبــــابي وأعز من الحروف وقوافيها
وتالي العز تجي وفي ايدك طعــــــون للقلب بثقال
اقولك اجلب ويهك واقبض البـــــــاب ولا تجاريها
وقـــولهم ترى راغتني فلانه بــــلا طيب ولا بهال
***
مها بحدة : سيفو جسوم نشوا بسرعة يلا ..
جاسم : امييييي بتم ويا باباااااا ..
مها طالعت محمد بصدمة : ومن متى لك علاقة فيه ؟؟
محمد رفع نفسه عن مستوى جاسم وطالعها : تراه ولدي شرات ما هو ولدج .. ولي حق اجوفه ..
مها بضيج : ماقلت شي .. بس المفروض اعرف ..
محمد يلعب بطربوشه ببطء : خلاص عيل .. من اليوم وساير بيي وبجوفه ف بيتج ...
مها ما ردت عليه .. مب لشي .. لانها صج ما عرفت شو ترد عليه .....
محمد بهدوء غريب : مهـــا ...
مها باندفاع : سيفو جسوم نشوا بسرعة يلا بنظهر ...
الدرب كان طويل من مكان اللعوب لين الباركات اللي هم فيها ...
لكن مها ما كانت حاسة بالوقت لانشغالها بوجود محمد وراها ...
" ليش يا محمد ظهرت لي من بعد ما ظنيت انك تبخرت من حياتي .. ليييش ؟؟؟!!! "
كانت تسوق السيارة بسرعة جنونية ..
والحمدلله ان الله ستر ووصلت البيت ...
جاسم وهو مغيظ على امه : ليش ما تميت ويا بابااااا ؟؟؟
مها تطالعه وهي مب عارفة شو ترد عليه : جسوم خلاص بابا مشغول وهب فاضي لك ..
جاسم وشوي شوي يصيح : ابا باباااااااااااااااااااااااااا ....
سيف وهو يطالع جاسم وتم يقلده : انا ابا باباااااااااااااااااااااا ..
احتارت مها شو تسوي باليهال ... اثنيناتهم يصيحون ..
لكنها ما فكرت وايد .. لانها انتبهت لجاسم وهو يركض صوب التلفون عشان يتصل ..
صدت له وتمت تطالعه وهو يرمس ..
جاسم وصوته كله صياح : باباااا تعاااااااال بابااا ..
سيف يسحب عنه السماعة : بابااااااا ابا العب ابغي حلاوة أبغي سياااااارة ..
مها كانت تطالعهم بصدمة .. هذيل مب عيالها اللي تعرفهم ولا اللي تعودت عليهم ..
لا إرادياً زخت السماعة عنهم وسكرت الخط ف ويه محمد ..
على طول اتجهت صوب الدريشة .. وانصدمت بوجود محمد صوب باب البيت ..
دق الجرس والخدامة فجت الباب ..
بعد ما تحجبت مها دش محمد ..
محمد بكل لطف : ممكن أدش ؟؟
مها متنرفزة منه : بعد ما دشيت عادة ؟؟
محمد يمثل انه بيظهر : خلاص عيل بظهر ..
جاسم يصارخ : بابااااااااااااااااااااا
وسيفو وراه مستوي ببغاء يقلده ف كل شي خخخ ..
فج محمد ايديه عشان يحظنهم اثنيناتهم ..
مها يلست تتأمل المنظر .. ولا إرادياً دمعت عينها ..
محمد يالس يحظن جاسم وسيف ... صح ان سيف هب ولده بس مهتم به أكثر ..
شلهم اثنيناتهم ... وتم واقف ..
محمد بابتسامة تخبل : ممكن أيلس ؟؟
مها تنفست بصوت واضح : تفضل ..
نشت مها صوب المطبخ .. وجهزت قلاصات العصير ..
لا إرادياً طلت من ستارة المطبخ ع الصالة تطالع الوضع اللي يستوي ..
جاسم وهو مبوز : انته قلت لي بتلعبني ..
محمد : ههههههههه بلاااااك يا رياااال .. الرياييل ما يلعبون ..
سيف : وايد دلوووع جسوم صح بابا ..
محمد يبتسم لسيف بحب : انته شاطر صح ؟؟
سيف : هييييه .. انا سيف ولد منصووووووووور لازم ..
محمد نزل راسه .. بس بسرعة رد رفعها والتفت لجاسم : وانته ولد منوو ؟؟
جاسم بغباء : انا ولد امي ..
محمد : ههههههههههههههههههههههههههههههههههههههههه منو ابوك ..
جاسم : انته بابا ...
محمد يلمه لحضنه : فديتك والله ...
سيف بوز : بابا ليش ما تحضني ؟؟
محمد يمسكه ويحضنه بقوة : تعال يا بعد روح وقلب بابا ... تعال ..
تماسكت مها .. وشلت صينية العصير وسارت له ...
يلست بعيد عنهم .. لكن فكرها كله وياهم ...
بعد ما ساروا جاسم وسيف يلعبون بأمر محمد ..
محمد بعذوبة : مها ..
مها وهي منزلة راسها : نعم ؟
محمد : رفعي راسج يا مها أنا محمد ..
مها : لا تنسى انك هب محرم لي ..
محمد : وانا ياي بسبة هالشي. ..
مها : بليييييز ..
محمد يقاطعها : مها انتي اسمعيني ..
مها : مالي خلق أضيج بعمري ..
محمد : يوم طلبتي الطلاق ما سمعتيني أبد .. هالمرة اسمعيني .. مها اسمعيني ولو مرة ..
مها : قول اللي تبا تقوله ..
محمد : أمل خدعتني للمرة الثانية ..
مها تقاطعه : وانته ياهل عشان تقص عليك مرتين ؟؟
محمد : ارجوج اسمعيني يا مها بدون ما تقاطعيني ..
مها تنهدت : اسمعك ..
محمد : طيحت اللوم كله على سالم ... بينت نفسها انها بريئة ..خبرتني انها بتنتحر .. حسيت حزتها ان دمها ف رقبتي .. لين ما خذتها آخر شي ... انا كنت متمسك فيج لآخر لحظة .. أدريبج لاحظتي اني تغيرت عليج وايد بس والله ان نفسي كانت عايفة أمل .. مع انها كانت تدعي الحب لي .. لكن سبحان الله .. اللي يعيش في جنتج .. يظن حياة الناس الباقية نار . .
مها طالعته بدون أي رد فعل ... لانها تعرف كل هذا ..
محمد : وانتي ييتي و طلبتي الطلاق مع اني تمسكت فيج لآخر لحظة بس تهديد امل وادعائها بالحمل اذا فكرت اردج انها بتهدني وبتحرمني من الياهل خلاني أطلقج من اول مرة ياني فيها منصور ..
مها طالعت فوق وبدت تهز ريولها من شدة التوتر ..
محمد : من طلقتج وأمل انجلبت 180 درجة .. تسبني وتحتقرني وانا صابر لاني ما أبغي أخسر ولدي .. وف عزا ابويه جان تذكرين .. والموقف اللي استوى جدامج .. من ظهرتي ييت وصفعتها بقوة .. وصدمتني اكبر صدمة ف حياتي .. قالت انها لا حامل ولا شي وانها ما تيب عيال ... ( مها فجت عيونها من الصدمة ) والله انصدمت .. وف ذاك الوقت حسيت ان كل ها جزاي في اللي سويته فيج .. في اللي سويته ف المرحوم أبويه .. في سارة اللي لا ليلها ليل ولا نهارها نهار .. مع جسوم الجلب .. الحمدلله ان الله فكها منه ..
مها بهدوء : الحمدلله ..
محمد : تيننت أكثر يوم عرفت انج خذتي منصور الله يرحمه .. لكن الحمدلله .. من رديت لربي اكتشفت ان منصور يصلح لج اكثر مني .. ع الأقل شارنج ويباج .. وعارف ربه عدل ..
مها وهي باين عليها التأثر : الله يرحمه ..
محمد : طلقت أمل اللي هددتني بانها بتنتقم مني ومنج .. لكن الله فوق .. وهي اللي ماتت موتة شنيعة .. اظني تعرفين انها انعدمت ..
مها بضيج : الله يرحمها ..
محمد بهدوء : بعد ما عرفت ان عندي ولد .. حاولت اني اجوفه بس انتي رفضتي .. .. وبعد فترة عرفت بوفاة منصور الله يرحمه .. وبعد حاولت ورفضتي .... الين ما كبر جاسم .. .. اللي خذت وقت لين ما تعود علي ....
مها تمت ساكتة وتفكر ف رمسته كلها ..
محمد بصوت مبحوح : مها انا أحتاجج الحين أكثر من أي وقت .. أرجوج ارجعيلي .. ارجووج ..
مها : وتهقى أنا بقدر أنسى اللي سويته فيني بهالسهولة ؟؟
محمد : مافي إنسان معصوم من الغلط يا مها .. وانا غلطت .. ارجووووج سامحيني ..
مها : دام الله يسامح انا شحقه ما أسامح ؟؟
محمد بفرح : يعني بترديلي يا مها ..
مها بانكسار : لا يا محمد .. انته جرحتني جرح عمره ما بيبرى .. معقولة تباني أرد لك بهالسهولة ؟؟
محمد : مها انا وايد تغيرت .. صدقيني ..
مها : بس التغيير هذا بيدوم ولا من برد بترد لطبعك الجديم ؟؟
محمد : آه يا مها .. صدقيني اني تغيرت .. صدقيني ..
مها : آسفة يا محمد آسفة ... انا مضطرة ارفضك ..
محمد بانكسار : مب مشكلة يا مها .. انتي فكري عدل .. وتأكدي اني اتريا ردج بأقرب وقت ..
مها هزت راسها بإيجاب من غير ما ترد عليه موليه ..
نش محمد من مكانه .. وظهر من البيت ..
طاحت مها ع القنفة ويلست تكلم عمرها . .
مها : ماشا الله عليك يا محمد ... شخصيتك وايد تغيرت ... استويت انسان ثاني .. حتى شكلك .. ماشا الله استويت أحلى ولك هيبة ( شهقت ) أصلاً انته ما تهمني .. أنا أرملة منصور .. ولا يمكن آخذ محمد .. مستحيل..
-----------------
سارة : انخطبت ؟؟؟؟
محمد بخبث : يا الله يا سوير قمتي تخبلين اليالس اوه اقصد الواقف ..
سارة بحيا : يلا عاد يلا عاد عن الحركات ..
محمد : ههههههههههههه ...
سارة : انزين منو هو ؟؟
محمد : ربيعي ف الدوام ..
سارة بخيبة امل : وهو شدراه فيني ؟؟
محمد : جافج .. وأعجب فيج ..
سارة بضيج : معرس ؟؟
محمد :ههههههههههه لا .. مطلق .. حرمته كانت متسلطة شويه .. فطلقها ..
سارة : وما عنده عيال ؟؟
محمد : لاء ..
سارة بغيظ : وانته عادي عندك واحد يقولك انا جفت اختك وبخطبها ؟؟
محمد : يا ختي تراه اعترف لي انه قصده شريف .. ويا خطبج على طول ..
سارة : وشحقه الحينه خبرتني ؟؟
محمد بخبث : كنت متضايج والحين ارتحت ..
سارة باستغراب : هااا .. ما فهمت ؟؟
محمد : ههههههههههه .. لا ماشي . .
سارة : اعترف .. شو خاش عني ؟؟
محمد : شلق خخ ..
سارة : محــــمممممد .. انطق ..
محمد بابتسامة زادت من وسامته : كل شي بوقته حلو .. يا حلو ..
سارة : ادري اني حلوة ..
محمد : يالله ع الثقة .. انزين خبريني شو ارد ع الريال ؟؟
سارة : مب لازم افكر ؟؟
محمد : غصب عنج بتفكرين .. صلي استخارة والله ما بييسر لج الا كل خير ..
سارة : ان شا الله ..
.
.
مع مرور الوقت .. صلت سارة استخارة ..
والحمدلله الله يسرها كل شي ..
وتمت الموافقة ..
بسكم عاد ما بنسوي ملجة خخ ولا عرس ..
الله يهنيكم ان شا الله :) ..
-------------
بس يا ترى منو تم غير مها ومحمد ؟؟؟؟
.
.
هل يأس محمد ولا شو ؟؟؟
.
.
بالعكس .. كانت محاولات محمد الأجدر ان نقول عنها .. محاولات ما حصلتش خخ .. كان دايماً يسير عندها بحجة انه بيجوف سيف وجسوم ..
.
.
ف يوم العــــيد ..
بعد صلاة العيد على طول .. كان محمد معسكر عند الباب .. اونه عاده واقف عشان يعيد على جسوم وسيفو ..
محمد : ليش عندج شك انتي بعد ؟؟
* علينا علينا ؟؟ يا الخراااط .. اسميك خراط عود *
محمد : هع هع .. تعجبيني والله .. فاهمتني . خخ ..
.
.
سيف يركض لمحمد : باباااااااااااااااااااااا ..
محمد يشله ويحضنه : هلا هلا والله بولدي حبييييبي ..
جاسم وهو واقف صوب الباب : وانا مالي رب ؟؟
محمد يطالعه وهو فاج حلجه : حشى مب لسان عليك . طالع على قلب دبي ..
* ايه ايه مصختها .. جيه انا ام جسوم وانا مادري.. ؟*
جاسم : ههههههه .. بابا دش داخل ..
محمد : وينها ماما ؟؟
جاسم : يالسة تتعدل مادري حق منو ..
محمد صدق عمره : حقي ..
سيف : دش دش ..
ودش محمد .. ويلس ويا اليهال ف الصالة ..
جسوم وسيفو تراهم ما ينعطون ويه ..
تموا يخرطون عليه وكل واحد خر اللي عنده وفضحوا مها ..
جاسم : هذاك اليوم تمت تمشي وهي راقدة ..
سيف : جان اجب عليها قلاص ماي عسب تنش ..
جاسم يطالع سيف بغباء : انا اللي جبيت مب انته .
سيف : لا انا ..
جاسم : سيفووو لا تجذب ..
سيف بغباء : اصلاً ماما ما تنش الفليل ..
جاسم : انته جذاب ..
محمد : هههههههههههههههه .. انطموا احسن لكم .. مالت ..
جاسم + سيف بكل غباء : عليك ..
محمد فج عيونه عليهم : لا والله ؟؟
ركضوا اليهال من الزيغة وساروا يزقرون مها ..
نزلت مها اللي كانت مفتشلة من وجود محمد ...
مها : السلام عليكم ...
محمد نش لها : وعليكم السلام والرحمة .. عيدج مبارك ..
مها : الله يبارك فيك .. (افتشلت) اتفضل ايلس اشحقه واقف ..
يلس محمد وعينه على مها مب طايع يشلها ..
محمد يغمز حق سيف ( شكلهم متفقين ع شي )
سيف : بابا انته ليش ما اتي بيتنا ؟؟
محمد بخبث : تراني انا هني وياك الحينه ..
جاسم يضحك (ما ينفع حق التمثيليات) : هههههه يعني ليش ما تتزوج ماما ..
محمد فج عينه عليه ( يعني اسكت) ..
مها طالعت جاسم باستغراب .. : جسوم عيب عليك ..
محمد طالعها بحزن : ليش يا مها .. انا كم مرة ييت وطلبتج .. وانتي رديتيني ..
مها : شو يضمني ما ارد اعيش ذيج العيشة ..
محمد : ذيج العيشة .. وسيف وجاسم ويانا ؟؟
مها تنهدت : القرار صعب ..
سيف يصيح : ابا بابااا ..
جاسم وهو يمثل انه يصيح بس يضحك : ههههه انا بعد ابا بابااااا ..
محمد : دخيلج يا مها وافقي .. خلنا نرد لبعض .. ونكون عايلة ..
مها نزلت راسها ..
سيف سار لها : ماما تزوجي بابا ...
محمد فيه ضحكة ..
مها تطالع سيف بحنان : حبيبي انته منو مطرشنك عليه ؟؟
جاسم : ابويه بعد منووو ؟؟
محمد يطالعه بإجرام : انا ؟؟؟؟؟
مها وهي تضحك ع شكله : جاسم عيب ..
محمد بتوسل : دخيلج مها وافقي ..
سيف : دخيلج ..
جاسم : ههههههههه دخيلج ..
مها طالعتهم بحيا وابتسمت .... عقبها نشت بتظهر ..
جاسم ومحمد وسيف يصرخون : يـــــــــــــــس !! ..
صدت عليهم مها وهي تتطالعهم بغباء : لا والله ؟؟
ثلاثتهم تموا يضحكون ..
وبجذي وافقت مها .. وتحددت ملجتهم ..
.
.
وقفوا بكل شموخ .. وعيونهم تعانق الدبلتين .. وسط تهاليل الكل ومباركتهم .. الكل كان حاضر هالمرة ..
شما / ميرة / سامية / سارة /عائشة/ حليمة .. كل أبطال قصتنا موجودين .. ناقصنهم المرحوم بو محمد ... دعوله ف ظهر الغيب بالجنه .. وردوا يحتفلون احتفالهم الخاص ....
مها تطالع محمد المرتبك وكأنه أول مرة يتزوج ..
”وقف .. ونظــــــــرة عينه تعاني
تقول كــــــــــلام ٍ وودهــــا تبوح
شفته ضـــــايع و به شي ثـاني
يقـول كلمه ويــــرجع ويــــــروح“
ابتسمت له بحب ..
محمد يهمس لها والكل يطالعهم : هاي الدبلتين لي انا وانتي وبس ... مها .. ومحمد ..
مها ضحكت ..
” انت الغــــــرام ومصدر حنـــاني
وانت أنفــــــاس حبي المفضوح“
محمد : عهد علي .. طول العمر .. تبقين لي .. تبقين قلب محمد .. وعيون محمد .. وروح محمد ..
سارة شهقت : حشى حشى .. وانا شو بظهر ؟؟
محمد يزخ ايد مها : انتي .. ممممم ( بكوميدية ) انتي الرزة ف حياة محمد ..
تم الكل يضحك عليهم ..
محمد باستغراب كبير : ليش لابسة هالخاتم ؟؟ ماحيد اني عطيتج اياه ؟؟!!!
” التفت علي ّواتجــــــدم بمكاني
وفي عينه غضب وجــــــــروح
شــــــــاف الدبله بايدي وجاني
يقـــــول ليه يامن سكنت الروح
ليه طـــعنت حبــــــــك بكيـاني
نزف قلبـــــــي ودمه صاير نزوح
ليه بعت خلك وحبـــك الأولاني
هدمت حب ٍ بنيـــــــــته وصروح“
مها تبتسم بخبث : اسمح لي الشيخ كنت حاطتنه شكل قبل ما سيادتك تشرف وتييب خاتم يديد ..
”راح .. غـــــــاب سنيــن لا ثواني
نــــــاديته وقلت لــــــه الوضوح
لاهي دبلتـــــي ولا احد ٍخذاني
كنت أجربها وصــارت بايدي تلوح“
محمد : قولي جيه من الصبح .. يلا ظهريه من ايدج مابا الا خاتمي ف ايدج .... وبس !!!
شل الخاتم من صبعها ..
وبكل رومانسية .. دخل الدبلة ف يد مها
”وقف .. ونظــــــــــرة عينه تعاني
ابتســـم .. والعين بالكـــلام تبوح“
بكل فرحة في هالكـــــــــــــــون ..
عــــــــادت إشراقة الشمس البراقة ..
عادت لربوع الأزهار أنفاسها ..
عــــادت مها لمـــحمد ..
عشان يكملون القصة ..
قصة ياقلبي انساها ولو كنت تتنفس هواها ...
القصة الخالدة ..
قصة كل زوجين حرصوا على المودة والتآلف..
قصة كل اثنين عاشوا بمشاعر غريبة ما عرفوا كيف تفسيرها ..
الحين لكم تفسيرها ..
والحين بتتأكدون ان المشاعر الصادقة لا يمكن تتغير .. تتغير النفوس .. ولا تتغير المشاعر ..
يتغير الكل ..
الا حب بطلينا
~(( مها & محمد ))~
راح يتم حب أزلي شريف ... طول الزمــــــــــــان ..
النـــــهـــــايــــــة ....
***
نهاية ..
يا قلبي انساها ولو كنت تتنفس هواها ..
احييكم تحية كبيرة ..
وعندي بعض النقاط ابغي اوضحها لكم ...
* عنوان القصة ..احترت فيه في البداية.. كنت أبغي عنوان قوي وجارح جداً .. يعني فكرت في "ياقلبي لا تأمن نفسك لحرمة" بس حسيته شوي منقع ومب راكب .. "ارفع مقام قلبك دامه مب مسلم لحرمة" بعد ما اقتنعت فيه .. وبصراحة انا يمكن حطيت فوق 15 عنوان .. حتى ان البارتات الأولى يوم كنت اطرشها لربيعاتي كنت اكتب العنوان "قصتي اللي مالها عنوان" لكن كل الشكر لأختي الغالية لانها هي اللي ساعدتني على وضع هذا العنوان ....
***
شخصيات القصة .. ممم ابغي ارمس عنها شويه ..
( محمد )
وآخ منك يا محمد .. حطيته بطل للقصة روحه .. لاني لاحظت ان معظم القصص تنحصر على بطلين او ان ما يكون فيها بطل معين .. كم كرهته وكم كان ودي اجتله وافتك منه .. بس مهما كان .. يتم بطلنا اللي له نزواته وغلطاته ..
(مها)
يمكن تضحكون لو قلتلكم اني عطيتها وايد ملامح من شخصيتي .. هي نعم .. انا القوية .. الضعيفة في مواقف .. المغرورة .. الواثقة .. اللي ما تعرف تتصرف في مواقف قوية .. كم كنت احبها .. وسبب اختياري لهالإسم اني احسه مميز .. وكل وحدة تملكه "مميزة " ..
( بو محمد )
هالشخصية كنت وااايد احبها .. مادري يوم اكتب عنها لازم اضحك .. حبيت هالشخصية .. وما هان عليه اموتها .. ممم للعلم بس ان اللي صار لبومحمد من الواقع .. بس صارت لشخص ف مقتبل العمر .. لكن الحمدلله هاك تلاحقوا عليه وعايش ولله الحمد ..
(سارة )
مرت لحظات وايدة عليه كرهتها فيها .. كنت اقول استغفر الله انا شو اللي خلاني ادخلها فهالقصة .. بس بعد مهما كان هي اضافت نكهة للقصة .. لا تنسون انها هي اللي خلت محمد ياخذ مها
( سامية )
فديتها والله كانت من متابعي القصة ف منتدى ثاني .. حبيتها وحبيت شخصيتها .. مع اني ما خليتها شرات ما هي ف الواقع .. بس كشخة الاخساس اللي سويته فيها وزوجتها حمد خخ .. لو تدري تذبحني ..
( ميرة )
فديت روحها والله .. انا وهي والضرايب رباعة ... وهي شاعرتنا المميزة .. هي أصلاً بكبرها مميزة .. ما هان عليه أخليها منحوسة ف كـــل القصة .. آخر شي زوجتها اللي تباه حليلها خخ .
( شما )
هاي اللي بالغت شوي وسويتها سندريلا الخليج .. خخ .. ادري بتجلتلني بعد ما تقرى هالرمسة .. بس ترى للعلم المقلب اللي استوى واقعي 100% وبسبته طاحت ف ستين الف داهية خخ ..
( عائشة )
فديتها المصرية والله .. مع احترامي لكل اهل مصر .. ما بغيت أزوجها الصراحة ... لاني ما اتوقع انها ف الواقع بتتزوج .. وبعدين الحياة مب كلها زواج .. صح ولا لاء :) ..
( حليمة )
هاي اللي ما دخلتها ف القصة وايد .. تدرون ليش ؟؟ لان هالانسانة اصلاً تستاهل قصة روحها .. حليمة ؟؟ والله لو ايلس اكتب عنها لـ 100 سنة ورى ما بوفي حقها ..
( أمل )
اترفع اني اتكلم عن وحدة بهالمستوى .. ماظني ان في انسان ممكن يكون شراتها ..
( خالد )
عاد للامانة انقهرررررت ليش خليته شخصية شريرة .. وايد احب هالإسم .. اسم خالد بالنسبة لي وااايد مميز وغالي على قلبي .. فديته اسم اخويه الغالي .. يالله عاد جان يلست امدحه ما بخلص خخ ..
( منصور )
وحليله موته في نهاية القصة .. لكن صج كنت أعزه .. كنت ف البداية بموته جيه يعني ف حادث غير متعمد .. بس حسيت هالشي ما ينبلع >> اكل .. فقلت شحقه ما يوصل هالانتقام ف أمل انها تتعمد قتله ؟؟ فكرة صح خخ ...
( جاسم & سيف )
فديتهم والله .. وايد احب اسم سيف
( حمد )
هع هع .. الشمبانزي خخ .. حليله والله .. ترى هذا بعد شخصية واقعية
( جاسم )
حسبي الله عليه .. هههههه .. بس جان تبون الصج انا يمكن اخترت هالإسم لشخصية اعرفها ... بس للأمانه ما اتوقعها تكون جيه ..
( خليفة )
والله ان سالفة الاسم صدقية >> هدي هدي .. شبلاج مفولة .. بس كشخة والله .. جان يسوي عرس انا بحضر وبآزره خخ .. >> بتجتلني ميرة ..
( سلطان )
سلطتنا والله .. ايام التويكس والتايم آوت .. هههههه ... ادري اني قهرت ميرة بس يالله السموحة ..
(سلامة )
هاي خلوها ما بغيت أطريها .. لو اني طريتها جان اتضاربت وياها خخخ .. فديتها والله .. ام لسانين ..
وغــــيرهم ..
( بطي ) & (شيما ) ( راشد )
واسمحولي عادة جان القصة شويه تلخبطت ..
بس هو اظهار لما يكمن في نفسي ..
.
.
يمكن تقولون قصة يا قلبي انساها ولو كنت تتنفس هواها انتهت ..
لكنها ما انتهت بالنسبة لي ..
لأاني عشتها لحظة بلحظة .. وساعة بساعة ..
قصتي هاي .. اللي نشرتها بعد اكثر من10 روايات ألفتها ..
عشت حياة أفرادها ..
وحسيت بمعنى الترابط الأسري ..
كم لحظة حسيت فيها ان الرياييل ما منهم أمان ..
وكم لحظة بعد .. حسيت ان الوحدة تقدر بذكائها انها تكسب زوجها ..
يمكن بعضكم تحسبني ياهل .. وأفكر في سالفة الزواج ...
والبعض تحسب اني تعديت العشرين .. لاني تناولت امور يمكن جريئة بالنسبة للبعض ..
لكن انا .. بنت في الثانوية ..
حبيت اطلع بشي غيير عن العادة .. وان شا الله اكون فلحت ..
بغيت اتكلم عن شي يدور ف خاطري ..
أتمنى تكون فكرتي وصلت لكم ...
وأتمنى ان دمي ما كان ثجيل عليكم ...
وللي تابعوا قصتي .. اقولهم .. رايكم يهمني بعد هالنهاية ..
لكن سؤالي الحين ..
هل كل نهاية بتكون سعيدة شرات قصتي ؟؟
يمكن النهاية بتوصل للطلاق والزواج من شخص يستاهل أكثر ..
أو يمكن توصل لموت الزوج الثاني .. وصد محمد .. وبالتالي مسيرة من الاحزان ..
ما دري اذا النهاية حازت على رضاكم او لاء ..
لكن كل اللي اتمناه .. انكم تسامحوني ..
وألقاكم ان شا الله في قصة ثانية .. بفكرة مختلفة 180 درجة ..
وان شا الله بتكون بفكرة يديدة ....
بتكون كاملة وبتنزل لكم ف اوقات محددة ..
واسمحولي مرة ثانية ..
خويتكم .. قمرية